صدر مملکت آصف علی زرداری کا کورونا ٹیسٹ مثبت، وزیراعظم شہباز شریف نے دعا کی اپیل کی

کراچی ( اباسین خبر)صدر مملکت آصف علی زرداری کراچی کے اسپتال میں زیر علاج ہیں، جہاں ان کا کورونا ٹیسٹ مثبت آیا ہے۔ وزیراعظم شہباز شریف نے صدر مملکت کی صحت کے لیے قوم سے دعا کی اپیل کی ہے۔وزیراعظم نے اس سے قبل صدر زرداری کو فون کر کے ان کی خیریت دریافت کی تھی اور ان کی صحت سے متعلق اظہارِ تشویش کیا۔ وزیراعظم نے صدر مملکت کی جلد شفایابی کی دعا کی اور انہیں بہترین طبی سہولتیں فراہم کرنے کی ہدایت کی۔صدر کے ذاتی معالج ڈاکٹر عاصم حسین نے جیو نیوز کو بتایا کہ کورونا ٹیسٹ مثبت آنے کے بعد صدر زرداری کی ملاقاتوں پر پابندی عائد کر دی گئی ہے اور انہیں مکمل آئسولیشن میں رکھا جا رہا ہے۔ ڈاکٹر عاصم حسین کے مطابق آصف علی زرداری انفیکشس ڈیزیز کے ماہرین کے زیرِ علاج ہیں اور ان کے کئی ٹیسٹ کیے جا چکے ہیں، جس کے ساتھ مکمل مانیٹرنگ کی جا رہی ہے۔دوسری جانب سندھ کے سینئر وزیر شرجیل میمن نے صدر زرداری کو دبئی منتقل کرنے کی خبروں کو مسترد کیا ہے۔ انہوں نے کہا کہ صدر زرداری 4 اپریل کو ذوالفقار علی بھٹو کی برسی کے جلسے میں شرکت نہیں کریں گے، اور برسی کی تقریب سے بلاول بھٹو زرداری خطاب کریں گے۔گورنر پنجاب سلیم حیدر، گورنر کے پی فیصل کریم کنڈی اور گورنر سندھ کامران ٹیسوری نے بھی صدر زرداری کی جلد صحت یابی کے لیے دعا کی ہے۔ گورنر ٹیسوری نے صدر زرداری کے لیے اسپتال میں گلدستہ بھی بھجوایا ہے، جبکہ اسپیکر پنجاب اسمبلی ملک احمد خان نے بھی ان کی جلد صحت یابی کی دعا کی ہے۔