وزیرِ اعلی پنجاب مریم نواز کا بڑا اعلان: پنجاب بھر میں 13 نئے سہولت بازار قائم کیے جائیں گے

لاہور( اباسین خبر)وزیرِ اعلی پنجاب مریم نواز نے اعلان کیا ہے کہ پنجاب بھر میں نئے سہولت بازار قائم کرنے کی منظوری دے دی گئی ہے۔ انہوں نے 13 نئے سہولت بازاروں کے زیرِ تکمیل پراجیکٹس کو جلد مکمل کرنے کا حکم دیتے ہوئے ان پراجیکٹس کے لیے اگست کی ڈیڈ لائن مقرر کی ہے۔مریم نواز نے کہا کہ نئے سہولت بازار نوشہرہ ورکاں، بورے والا، کبیر والا، سانگلہ اور جلال پور میں قائم کیے جائیں گے، جبکہ بہاولپور، اٹک اور مری میں اضافی سہولت بازار بنانے کا بھی فیصلہ کیا گیا ہے۔ انہوں نے مزید کہا کہ ضلعی انتظامیہ کو ان بازاروں کے لیے اراضی مختص کرنے کی ہدایت کر دی گئی ہے۔وزیرِ اعلی نے یہ بھی بتایا کہ سہولت بازاروں کو سولر انرجی پر منتقل کرنے کی منظوری دے دی گئی ہے، اور اس مقصد کے لیے 69 کروڑ روپے سے زائد فنڈز کی منظوری بھی دی گئی ہے، جس سے یہ منصوبے شمسی توانائی پر منتقل ہوں گے۔