پاکستان میں سرمایہ کاری کرنیوالے بیرونی ممالک کے سرمایہ کاروں کو ہر ممکن سکیورٹی فراہم کرینگے: آرمی چیف

اسلام آباد( اباسین خبر)آرمی چیف جنرل عاصم منیر نے کہا ہے کہ انہیں پختہ یقین ہے کہ پاکستان عالمی معدنی معیشت میں ایک رہنما کے طور پر ابھرنے کے لیے تیار ہے۔ اسلام آباد میں پاکستان منرل انویسٹمنٹ فورم 2025 سے خطاب کرتے ہوئے انہوں نے کہا کہ پاکستانی عوام کے پیروں کے نیچے وسیع معدنی ذخائر ہیں، اس لیے مایوسی اور بے عملی کی کوئی گنجائش نہیں۔انہوں نے مزید کہا کہ پاکستان عالمی اداروں کو خوش آمدید کہتا ہے تاکہ وہ اپنی مہارت سے پاکستان کو معدنی ذخائر کے حوالے سے آگاہ کریں، سرمایہ کاری کے مواقع تلاش کریں اور وسائل کی ترقی میں ہمارے ساتھ شراکت داری کریں۔ آرمی چیف نے بتایا کہ اس شعبے کی ترقی کے لیے انجینیئرز، جیالوجسٹ، آپریٹرز اور دیگر ماہرین کی ضرورت ہے، اور اس مقصد کے لیے طلبا کو بیرون ملک تربیت دی جا رہی ہے۔ اس وقت بلوچستان کے 27 طلبا زیمبیا اور ارجنٹینا میں منرل ایکسپلوریشن کی تربیت حاصل کر رہے ہیں۔جنرل عاصم منیر نے کہا کہ اقتصادی سلامتی قومی سلامتی کا ایک اہم حصہ ہے، اور پاک فوج اپنے شراکت داروں اور سرمایہ کاروں کے مفادات کے تحفظ کے لیے مضبوط سکیورٹی اقدامات کرے گی۔ ان کا کہنا تھا کہ پاکستان میں معدنی صنعت کی ترقی کو یقینی بنانے کے لیے اپ اسٹریم اور ڈان اسٹریم دونوں شعبوں پر کام کیا جائے گا۔انہوں نے یہ بھی کہا کہ پاکستان میں ریفائننگ اور ویلیو ایڈیشن میں سرمایہ کاری کی ضرورت ہے تاکہ لاگت کو بہتر بنایا جا سکے اور منڈیاں متنوع ہو سکیں۔ ان کا کہنا تھا کہ پاکستانی عوام کے پاس نہ صرف وسیع معدنی ذخائر ہیں، بلکہ ان کے پاس مہارت اور شفاف معدنی پالیسی بھی موجود ہے، اس لیے مایوسی کی کوئی گنجائش نہیں۔آرمی چیف نے بلوچ قبائلی عمائدین کی کاوشوں کو سراہا جنہوں نے کان کنی کے شعبے کو فروغ دینے اور بلوچستان کی ترقی میں اہم کردار ادا کیا۔ انہوں نے کہا کہ پاکستان کا معدنی شعبہ اجتماعی فائدے کے لیے علاقائی ترقی، خوشحالی اور پائیداری کو فروغ دے سکتا ہے۔