بلوچستان حکومت کا اپوزیشن کو مذاکرات کی پیشکش، بی این پی لانگ مارچ پر سیکیورٹی خدشات کا اظہار

کو ئٹہ ( اباسین خبر)ترجمان حکومت بلوچستان شاہد رند نے کہا ہے کہ اگر اپوزیشن حالات بہتر کرنے کی صلاحیت رکھتی ہے تو حکومت مذاکراتی کمیٹی کی سربراہی اپوزیشن یا ڈاکٹر مالک بلوچ کو دینے کے لیے تیار ہے۔پریس کانفرنس سے خطاب کرتے ہوئے شاہد رند نے کہا کہ ڈائیلاگ کے لیے فورمز موجود ہیں، مگر بی این پی صوبائی اسمبلی اور محمود اچکزئی سمیت پی ٹی آئی قومی اسمبلی میں آنے کے لیے تیار نہیں ہیں۔انہوں نے بی این پی کے لانگ مارچ کو کوئٹہ پہنچنے سے روکنے کے فیصلے پر وضاحت دی کہ سیکیورٹی تھریٹ کی بنا پر بعض فیصلے کرنا پڑتے ہیں۔ شاہد رند کا کہنا تھا کہ بی این پی کے لانگ مارچ کے دوران کوئٹہ میں دہشت گرد حملے کا خطرہ ہے۔پریس کانفرنس میں ڈی آئی جی کوئٹہ اعتزاز احمد گورایہ نے کہا کہ ٹرین حملے کے بعد آپریشن میں مارے گئے دہشت گردوں کی لاشیں بی وائی سی کے لوگ اسی رات اسپتال سے لے گئے تھے اور اسپتال انتظامیہ کو مارپیٹ کے بعد لاشیں اٹھانے کی اجازت دی گئی تھی۔ انہوں نے مزید کہا کہ پرامن احتجاج کی بجائے سی سی ٹی وی کیمرے توڑے گئے اور آپٹک فائبر جلایا گیا۔