شہید بھٹو نے مایوسی کے گھٹا ٹوپ اندھیروں میں امید کا چراغ جلایا او رعوام کو شعور دیا:مینا مجید بلوچ

کوئٹہ( اباسین خبر)مشیر برائے کھیل و امور نوجوانان اور رکن صوبائی اسمبلی مینا مجید بلوچ (پیپلز پارٹی) نے شہید ذوالفقار علی بھٹو کی برسی کے موقع پر ایک اہم پیغام جاری کیا۔ انہوں نے کہا کہ آج کا دن ہمیں پاکستان کے عظیم قائد، شہید ذوالفقار علی بھٹو کی یاد دلاتا ہے، جنہوں نے پاکستان کے عوام کو شعور دیا اور انہیں خودداری و خود انحصاری کی راہ دکھائی۔مینا مجید بلوچ نے کہا، “شہید بھٹو نے مایوسی کے گھٹا ٹوپ اندھیروں میں امید کا چراغ جلایا اور ملک کو ترقی، استحکام اور خودمختاری کی جانب گامزن کیا۔ ان کی غیر معمولی سیاسی بصیرت نے پاکستان کو عالمی سطح پر وقار، معاشی بہتری اور دفاعی قوت عطا کی۔”انہوں نے مزید کہا، “شہید بھٹو نے 1973 کا آئین دے کر جمہوری اقدار کو مضبوط بنیاد فراہم کی اور عوام کو ان کے آئینی حقوق سے روشناس کرایا۔ ان کا ایٹمی پروگرام پاکستان کے دفاع کو ناقابلِ تسخیر بنانے کے لیے تاریخی قدم تھا، جسے کبھی فراموش نہیں کیا جا سکتا۔”مینا مجید بلوچ نے اس عزم کا اظہار کیا کہ “آج ہم شہید بھٹو کی برسی کے موقع پر اس عزم کی تجدید کرتے ہیں کہ پاکستان کو ایک جمہوری، خوشحال اور ترقی یافتہ ریاست بنائیں گے وہی خواب جو شہید بھٹو نے دیکھا تھا۔