پانی تقسیم کے مسئلے پر سیاست افسو سناک، پاکستان میں اب خوشخبریوں کا موسم شروع ہوگیا ہے: عظمی بخاری

لاہور( اباسین خبر)صوبائی وزیراطلاعات عظمی بخاری نے کہا ہے کہ وزیراعظم شہباز شریف چند دن میں ایک اور خوشخبری دیں گے۔ لاہور میں پریس کانفرنس کرتے ہوئے عظمی بخاری نے کہا کہ پاکستان میں اب خوشخبریوں کا موسم شروع ہوگیا ہے، اور وزیراعظم نے عوام کو ریلیف دینے کے لیے بجلی کی قیمتوں میں کمی کا اعلان کیا ہے۔ انہوں نے اس پر وزیراعظم اور ان کی ٹیم کو مبارکباد دی۔عظمی بخاری نے مخالفین پر تنقید کرتے ہوئے کہا کہ وہ جن کے آئی پی پیز اور بجلی کمپنیوں سے مفادات جڑے تھے، اب عوامی ریلیف کو برداشت نہیں کر پا رہے۔عظمی بخاری نے مزید بتایا کہ رمضان سہولت بازاروں میں عوام کو 1.11 ارب روپے کی بچت فراہم کی گئی، جہاں 3.57 ارب روپے کی خریداری ہوئی۔ 28 ہزار شہریوں نے سہولت بازاروں سے 3 کروڑ روپے کا سامان فری ہوم ڈیلیوری کے ذریعے حاصل کیا۔ انہوں نے یہ بھی کہا کہ اگست تک 13 نئے سہولت بازار قائم کیے جائیں گے اور 69 کروڑ روپے کی لاگت سے موجودہ بازاروں کو سولر انرجی پر منتقل کیا جائے گا۔خیبر پختونخوا حکومت پر تنقید کرتے ہوئے انہوں نے کہا کہ وہاں کرپشن کے قصے زبان زد عام ہیں، اور گنڈا پور کے 75 کروڑ روپے خرچ کرنے کے بیان کو تشویش ناک قرار دیا۔ ان کا کہنا تھا کہ کے پی میں صحت، تعلیم اور انفراسٹرکچر کی حالت بدتر ہے، اور کرپشن کے شواہد موجود ہیں، جن میں چترال میں جنگلات کے منصوبے سے خزانے کو 866 کروڑ روپے کا نقصان شامل ہے۔عظمی بخاری نے پانی کی تقسیم کے مسئلے پر سیاست کو افسوسناک قرار دیتے ہوئے بلاول بھٹو سے ذمے دارانہ کردار ادا کرنے کی اپیل کی۔پریس کانفرنس کے اختتام پر انہوں نے تھیٹرز کے ماحول پر تحفظات کا اظہار کیا اور کہا کہ اس حوالے سے وزیر اعلی سے بات کی گئی ہے اور جلد نیا لائحہ عمل سامنے آئے گا۔ انہوں نے الزام لگایا کہ تھیٹرز کی جانب سے انہیں بلیک میل کیا جا رہا ہے اور قانونی کارروائی کی دھمکیاں دی جا رہی ہیں۔