پاکستان میں آئی ٹی تربیت کا نیا دور: ایس آئی ایف سی اور ہواوے کا شراکت داری کا معاہدہ

اسلام آباد( کامرس ڈیسک)پاکستان میں ٹیلی کام سیکٹر کی ترقی اور آئی ٹی سرمایہ کاری کے لیے سپیشل انویسٹمنٹ فیسلٹی کونسل (ایس آئی ایف سی) کا کردار بہت اہمیت کا حامل ہے۔ اس کی معاونت سے چین کی معروف ٹیلی کام کمپنی ہواوے نے ایک بڑا قدم اٹھاتے ہوئے 3 لاکھ پاکستانیوں کو آئی ٹی تربیت فراہم کرنے کا اعلان کیا ہے۔ہواوے نے اپنے منصوبے کے تحت 60 ہزار پاکستانیوں کو جدید آئی ٹی تربیت فراہم کرنے کا عزم کیا ہے، جب کہ 2 لاکھ 40 ہزار افراد کو بنیادی آئی ٹی ٹریننگ دی جائے گی۔ یہ تربیت ایس آئی ایف سی کے تعاون سے ہواوے اور ہائر ایجوکیشن کمیشن (ایچ ای سی) کے اشتراک سے 15 جامعات میں فراہم کی جائے گی۔ اس تربیتی پروگرام کے ذریعے پاکستانی نوجوانوں کو جدید تکنیکی مہارتیں سکھانے کا مقصد حکومت کی اولین ترجیحات میں شامل ہے۔یہ اقدام نہ صرف آئی ٹی برآمدات میں اضافہ کرے گا بلکہ روزگار کے نئے مواقع بھی فراہم کرے گا۔ ایس آئی ایف سی کی سہولت سے اس پروگرام کا کامیاب نفاذ ڈیجیٹل انفراسٹرکچر میں بہتری اور آئی ٹی انقلاب کی راہ ہموار کرے گا۔ پاکستان کی معیشت کو ڈیجیٹل ترقی کی جانب گامزن کرنے کے لیے یہ منصوبہ ایک سنگ میل ثابت ہو گا۔ہواوے کے تربیت یافتہ ماہرین مقامی سطح پر نوجوانوں کو آئی ٹی کی جدید مہارتیں سکھائیں گے، جس سے نہ صرف افراد کی مہارت میں اضافہ ہوگا بلکہ اس سے معاشی استحکام کے امکانات بھی روشن ہوں گے۔ اس پروگرام کے تحت نوجوانوں کی صلاحیتوں کو بروئے کار لایا جائے گا، جو کہ ٹیلی کام سیکٹر کے فروغ کے لیے ایک اہم قدم ثابت ہو گا۔ایس آئی ایف سی کی یہ کوششیں پاکستان میں ٹیکنالوجی کے شعبے میں ترقی کی راہ پر گامزن کرنے میں اہم کردار ادا کریں گی، اور آئی ٹی سیکٹر میں سرمایہ کاری اور ترقی کے نئے دروازے کھولیں گی۔