رمضان ریلیف پیکیج 2025 کے تحت مستحقین تک رقم پہنچانے کا عمل جاری، 63 فیصد رقم تقسیم ہو چکی

اسلام آباد( اباسین خبر)وزیرِ اعظم شہباز شریف نے کہا ہے کہ رمضان ریلیف پیکیج 2025 کے تحت پیسے مستحقین تک ڈیجیٹل والٹ کے ذریعے پہنچائے جا رہے ہیں۔ اسلام آباد میں وزیرِ اعظم کی زیرِ صدارت پرائم منسٹر رمضان ریلیف پیکیج 2025 کے حوالے سے جائزہ اجلاس منعقد ہوا۔اجلاس میں وزیرِ اعظم کو رمضان ریلیف پیکیج 2025 کی پیش رفت پر بریفنگ دیتے ہوئے بتایا گیا کہ اب تک 63 فیصد مستحقین کو رقم پہنچا دی گئی ہے۔ بریفنگ میں یہ بھی بتایا گیا کہ پیکیج کی نگرانی کے لیے 2224 ملازمین ڈیوٹی پر مامور ہیں۔وزیرِ اعظم نے کہا کہ رمضان پیکیج پورے پاکستان بشمول گلگت بلتستان اور آزاد جموں و کشمیر کے لیے ہے، اور اس کی شفافیت کو یقینی بنانے کے لیے اسٹیٹ بینک، نادرا اور دیگر ٹیک اداروں کی کاوشیں قابلِ تعریف ہیں۔شہباز شریف نے ہدایت دیتے ہوئے کہا کہ رمضان ریلیف پیکیج کا تھرڈ پارٹی آڈٹ کروایا جائے اور اس ماڈل کو دیگر حکومتی اسکیموں میں بھی اپنایا جائے۔اجلاس میں وفاقی وزرا، چیئرمین نادرا اور پی ٹی اے کے نمائندے بھی شریک ہوئے۔