کراچی میں انوکھی واردات، چوردرزی سے گن پوائنٹ پر سلے ہوئے 80جوڑے لے کر فرار

کراچی( اباسین خبر) کراچی کے علاقے قائد آباد میں ایک انوکھی واردات ہوئی ہے جس میں مسلح افراد درزی کی دکان سے 80 سوٹ لے کر فرار ہو گئے۔ عید الفطر کی آمد سے چند روز قبل ہونے والی اس واردات نے 80 افراد کی عید کی خوشیاں خراب کر دی ہیں۔یہ واردات قائد آباد میں بہادر علی نامی درزی کی دکان پر ہوئی۔ بہادر علی نے نجی ٹی وی سے گفتگو کرتے ہوئے بتایا کہ رمضان میں ان کا کام دگنا ہو جاتا ہے اور وہ تقریبا 24 گھنٹے کام کرتے ہیں۔متاثرہ درزی نے بتایا کہ 19 مارچ کو صبح ساڑھے 4 بجے 2 مسلح افراد دکان پر آئے اور گن پوائنٹ پر سلے ہوئے 80 جوڑے لے کر فرار ہو گئے۔ انہوں نے یہ بھی کہا کہ یہ واردات پہلے سے طے شدہ منصوبے کے تحت کی گئی تھی، کیونکہ مسلح افراد نے نہ تو پیسے یا موبائل وغیرہ لیے، بلکہ صرف سلے ہوئے سوٹ لے کر گئے۔بہادر علی نے مزید کہا کہ اس ڈکیتی کی وجہ سے نہ صرف ان کی بلکہ ان افراد کی عید بھی خراب ہو گئی جن کے سوٹ چوری ہوئے ہیں۔ وہ لوگ بھی میرے پاس آ رہے ہیں اور اتنی بڑی تعداد میں ان لوگوں کو سمجھانا میرے لیے بہت مشکل ہو رہا ہے۔متاثرہ درزی نے شاہ لطیف تھانے میں درخواست جمع کروائی ہے، تاہم ابھی تک کوئی کارروائی نہیں کی گئی۔ انہوں نے بتایا کہ اس ڈکیتی میں انہیں تقریبا 5 لاکھ روپے کا نقصان ہوا ہے اور وہ اس وقت بہت پریشان ہیں۔