طارق فاطمی کا امریکا کو واضح پیغام:دہشت گردی ہرگز برداشت نہیں کریں گے: پاکستان

نیویارک( مانیٹرنگ ڈیسک)وزیراعظم کے معاون خصوصی برائے خارجہ امور طارق فاطمی نے کہا ہے کہ امریکا کو واضح کر دیا ہے کہ پاکستان دہشت گردی ہرگز برداشت نہیں کرے گا۔نیویارک میں نجی ٹی وی سے گفتگو کرتے ہوئے طارق فاطمی کا کہنا تھا کہ ٹرمپ انتظامیہ کے ساتھ ہماری ملاقاتیں دوستانہ رہیں اور خطے میں مشکل حالات میں پاک امریکا تعاون بامعنی رہا۔ انہوں نے مزید کہا کہ نئی انتظامیہ کے آنے جانے سے ملکوں کے بنیادی معاملات تبدیل نہیں ہوتے۔طارق فاطمی نے بتایا کہ دہشت گردی کے خلاف امریکی صدر کے اہم بیانات سامنے آچکے ہیں، اور پاکستان نے امریکا کو واضح کر دیا کہ دہشت گردی کے خلاف کسی بھی نوعیت کی کارروائی پر پاکستان ہرگز خاموش نہیں رہے گا۔انہوں نے یہ بھی کہا کہ حال ہی میں پاکستان نے امریکا کو مطلوب اہم دہشت گرد پکڑ کر دیا، جس پر امریکی صدر نے پاکستان کے اس اقدام کو سراہا۔ دہشت گردی کے خلاف پاکستانی عوام اور قانون نافذ کرنے والے اداروں نے بڑی قربانیاں دی ہیں۔معاون خصوصی برائے خارجہ امور نے مزید کہا کہ وزیراعظم شہباز شریف چاہتے ہیں کہ ہمسایہ ممالک کے ساتھ بہترین معاشی تعاون ہو، اور آئندہ 3 سے 6 ماہ کے دوران پاکستان میں بڑی سرمایہ کاری آنے کا امکان ہے۔