صدر زرداری کی صحت میں بہتری آ نے لگی، وزیراعظم اور گورنر سندھ کی نیک خواہشات

کراچی( اباسین خبر)سندھ کے سینئر وزیر شرجیل انعام میمن نے کہا ہے کہ صدر مملکت آصف علی زرداری کی صحت میں بہتری آ رہی ہے۔ انہوں نے اپنے بیان میں یہ بھی وضاحت دی کہ صدر آصف زرداری کو دبئی منتقل کرنے کی خبریں غلط ہیں اور وہ جلد مکمل صحتیاب ہو جائیں گے۔یاد رہے کہ صدر آصف زرداری کو نواب شاہ سے کراچی کے نجی اسپتال منتقل کیا گیا تھا، جہاں ان کے میڈیکل ٹیسٹ کیے گئے۔ اسپتال ذرائع کے مطابق صدر آصف زرداری کو انفیکشن اور بخار کے باعث اسپتال میں داخل کیا گیا تھا۔وزیراعظم شہباز شریف نے بھی صدر مملکت آصف زرداری سے رابطہ کیا اور ان کی خیریت دریافت کی۔ وزیراعظم نے کہا کہ “پوری قوم کی دعائیں آپ کے ساتھ ہیں، اللہ آپ کو جلد صحت کاملہ عطا فرمائے۔”دوسری جانب، گورنر سندھ کامران ٹیسوری نے صدر آصف زرداری کے معالج ڈاکٹر عاصم کو ٹیلی فون کیا اور ان کی خیریت دریافت کی، ساتھ ہی نیک خواہشات کا اظہار کیا۔