پنجاب میں عید الفطر کے دوران مکینیکل جھولوں پر پابندی عائد

لاہور( اباسین خبر)عید الفطر کے دوران پنجاب میں عارضی نصب مکینیکل جھولوں پر پابندی عائد کردی گئی ہے۔صوبائی حکومت کے مطابق یہ اقدام انسانی جانوں کے تحفظ کے لیے کیا گیا ہے اور پابندی کا اطلاق پنجاب بھر میں ہوگا۔ ڈپٹی کمشنرز کے نام مراسلہ جاری کردیا گیا ہے۔ عید کے دوران تفریحی پارکوں میں بچوں سمیت بڑی تعداد میں لوگوں کی آمد متوقع ہے، جنہیں کھیل کے میدانوں، گیمنگ زونز اور مکینیکل جھولوں سے لطف اندوز ہونے کا امکان تھا۔مراسلے میں یہ بھی بتایا گیا ہے کہ تفریحی پارکس، تھیم پارکس اور پلے ایریاز میں مستقل طور پر نصب مکینیکل جھولوں کی مشروط اجازت ہوگی۔ ان جھولوں کے لیے فٹنس سرٹیفیکیٹ کا حصول لازمی قرار دیا گیا ہے۔مزید برآں، مستقل نصب جھولوں کے حفاظتی معائنے اور تمام ریگولیٹری معیارات پر عمل درآمد کے لیے متعلقہ ڈپٹی کمشنر سے تصدیقی سرٹیفیکیٹ حاصل کرنا ضروری ہوگا۔ محکمہ داخلہ پنجاب نے مرکزی کنٹرول روم بھی قائم کر لیا ہے جو 24 گھنٹے پنجاب بھر سے رپورٹس مرتب کرے گا۔سینئر افسران کی قیادت میں عید کی چھٹیوں میں امن و امان کے قیام اور حکومتی احکامات پر عمل درآمد یقینی بنایا جائے گا۔