لاہور( اباسین خبر)وزیر اعلی پنجاب مریم نواز شریف کی ہدایت پر سینئر صوبائی وزیر مریم اورنگزیب نے عام شہری بن کر جناح ہسپتال اور لاہور چلڈرن ہسپتال کا دورہ کیا۔مریم اورنگزیب نے بھیس بدل کر ہسپتال کے مختلف کانٹرز پر جا کر وارڈز کا معائنہ کیا اور ادویات کی مفت فراہمی، صفائی کا جائزہ لیا۔ اس دوران انہوں نے زیر علاج مریضوں کے لواحقین سے علاج اور مفت ادویات کی فراہمی کے بارے میں دریافت کیا۔مریضوں کے لواحقین نے جناح ہسپتال اور لاہور چلڈرن ہسپتال میں صفائی، علاج اور مفت ادویات کی فراہمی میں نمایاں بہتری کا اعتراف کیا۔ انہوں نے بتایا کہ تمام ادویات ہسپتال کی فارمیسی سے فراہم کی جا رہی تھیں، اور ہسپتال کی جانب سے مفت دوائی نہ ملنے کی شکایت کے لیے ہیلپ لائن بھی متعارف کرائی گئی تھی۔دورے کے دوران استقبالیہ پر مریضوں کی تعداد اور ان کے علاج کی تفصیلات سکرین پر دکھائی جا رہی تھیں، جب کہ صفائی کا عملہ صفائی کے کام میں مصروف تھا اور ہر وارڈ کے باہر گارڈز تعینات تھے۔مریم اورنگزیب نے ڈاکٹروں اور طبی عملے کی دستیابی کا بھی جائزہ لیا اور ایم ایس آفس جا کر کارکردگی پر وزیر اعلی کی جانب سے تمام ڈاکٹرز اور عملے کی تعریف کی۔یاد رہے کہ وزیر اعلی مریم نواز شریف نے 24 مارچ کو جناح ہسپتال لاہور کا اچانک دورہ کیا تھا جس کے بعد بدانتظامی پر ایم ایس کو معطل کر دیا گیا تھا۔ وزیر اعلی نے ہسپتالوں میں مفت ادویات کی فراہمی کو یقینی بنانے اور مریضوں کو باہر سے دوائی خریدنے کی صورتحال پر سخت برہمی کا اظہار کیا تھا۔وزیر اعلی کے دورے کے چھ دن بعد ہسپتالوں میں نمایاں بہتری دیکھنے کو ملی ہے۔
وزیر اعلی مریم نواز کی ہدایت پر مریم اورنگزیب کا جناح اور لاہور چلڈرن ہسپتال کا اچانک دورہ، اصلاحات کا جائزہ لیا
11
