ڈونلڈ ٹرمپ کا 25 ممالک پر جوابی ٹیرف عائد کرنے کا اعلان، پاکستان پر 29 فیصد ٹیرف

وا شنگٹن ( کامرس ڈیسک)امریکی صدر ڈونلڈ ٹرمپ نے 25 ممالک پر جوابی ٹیرف عائد کرنے کا اعلان کرتے ہوئے کہا کہ یہ اقدام امریکا کے لیے فائدہ مند ہوگا۔ وائٹ ہاوس میں پریس کانفرنس کرتے ہوئے ٹرمپ نے پاکستان پر 29 فیصد ٹیرف عائد کرنے کا فیصلہ کیا۔ انہوں نے کہا کہ پاکستان ہم سے 58 فیصد ٹیرف چارج کرتا ہے، اس لیے امریکا نے جوابا 29 فیصد ٹیرف عائد کیا ہے۔امریکی صدر نے بھارت پر 26 فیصد جوابی ٹیرف لگانے کا بھی اعلان کیا۔ انہوں نے مزید کہا کہ امریکا تمام درآمدات پر 10 فیصد ٹیکس عائد کرے گا اور غیرملکی ساختہ گاڑیوں پر 25 فیصد اضافی ٹیکس لگایا جائے گا۔ٹرمپ نے اس موقع پر کہا کہ آج کا دن امریکا کی تاریخ کے اہم دنوں میں سے ایک ہے کیونکہ یہ اقتصادی آزادی کا دن ہے۔ انہوں نے وضاحت دیتے ہوئے کہا کہ اگر کوئی ملک چاہتا ہے کہ امریکا ٹیرف کی شرح صفر کرے تو اسے اپنی مصنوعات امریکا میں تیار کرنا ہوں گی کیونکہ وہاں کسی قسم کا ٹیرف نہیں ہوگا۔اس کے علاوہ، ٹرمپ نے کمبوڈیا، جنوبی افریقا، انڈونیشیا، برازیل، سنگاپور اور دیگر ممالک پر مختلف شرحوں کے جوابی ٹیرف بھی عائد کیے۔