راکٹ لانچرز سمیت جدید خودکار اسلحہ کا استعمال،ڈیرہ غازی خان میں خوارجی دہشت گردوں کا بڑا حملہ پسپا

ڈیرہ غازی خان( اباسین خبر)ڈیرہ غازی خان کے سرحدی تھانہ وہوا کی جھنگی چیک پوسٹ پر خوارجی دہشت گردوں کا بڑا حملہ پولیس نے کامیابی سے پسپا کر دیا۔ ترجمان پنجاب پولیس کے مطابق، 20 سے 25 دہشت گردوں نے رات کی تاریکی کا فائدہ اٹھاتے ہوئے مختلف اطراف سے حملہ کیا اور راکٹ لانچرز سمیت جدید خودکار اسلحہ کا استعمال کیا۔ تاہم، پولیس کے الرٹ اہلکاروں نے زبردست مزاحمت کی اور جوابی فائرنگ سے دہشت گردوں کو فرار ہونے پر مجبور کر دیا۔پولیس کی جوابی کارروائی میں دہشت گردوں کو جانی نقصان پہنچنے کی اطلاعات ہیں۔ آر پی او ڈیرہ غازی خان سجاد منج اور ڈی پی او سید علی موقع پر موجود تھے اور آپریشن کی قیادت کی۔ مفرور دہشت گردوں کی تلاش کے لیے سرچ آپریشن جاری ہے۔آئی جی پنجاب ڈاکٹر عثمان انور نے اس کامیاب کارروائی پر ڈیرہ غازی خان پولیس کو شاباش دی اور کہا کہ جھنگی چیک پوسٹ کو مزید محفوظ بنانے کے لیے پنجاب حکومت کی فنڈنگ سے اضافی نفری، جدید آلات اور اسلحہ فراہم کیا گیا ہے۔ انہوں نے کہا کہ پنجاب پولیس کے بہادر اہلکار ملک و قوم کے دشمنوں کے سامنے سیسہ پلائی دیوار ہیں۔