شکیب الحسن ایک اورمشکل میں پھنس گئے،بنگلا دیشی عدالت کا اثاثے ضبط کرنے کا حکم

بنگلا دیش(سپورٹس ڈیسک)بنگلا دیشی عدالت نے کرکٹر اور عوامی لیگ کے سابق رکن اسمبلی شکیب الحسن کے اثاثے ضبط کرنے کا حکم دے دیا ہے۔ ڈھاکا کے ایڈیشنل چیف میٹروپولیٹن مجسٹریٹ ضیا الدین رحمان نے پیر کو چیک بانس کیس میں شکیب الحسن کی جائیداد ضبط کرنے کے حکم کی تصدیق کی۔شکیب الحسن نے 2016 میں ستکھیرا میں ایک کیکڑے کا فارم بنایا تھا جو 2021 سے غیر فعال ہے۔ یہ چیکس بینک سے لیے گئے قرض کی ادائیگی کے لیے جاری کیے گئے تھے، تاہم ناکافی فنڈز کی وجہ سے چیکس بانس ہو گئے تھے۔اکتوبر 2024 میں بنگلادیشی بینک نے بانس ہونے والے چیکس پر قانونی نوٹس جاری کیا تھا، اور بعد میں دسمبر میں شکیب اور ان کی کمپنی کے تین دیگر عہدیداروں کے خلاف مقدمہ دائر کیا گیا تھا۔ جنوری میں عدالت نے شکیب کے وارنٹ گرفتاری بھی جاری کیے تھے۔شکیب الحسن سیاسی بدامنی اور عوامی لیگ کے ساتھ وابستگی کے باعث جان سے مارنے کی دھمکیاں ملنے کے بعد بنگلا دیش سے باہر ہیں اور وہ گزشتہ سال حکومت مخالف مظاہروں میں نوجوان کے قتل کے مقدمے میں بھی نامزد ہیں۔