شمالی غزہ میں اسرائیلی فضائی حملے میں حماس کے ترجمان عبداللطیف القانوع شہید، کئی افراد زخمی

غزہ( مانیٹرنگ ڈیسک) حماس کے ترجمان عبداللطیف القانوع شمالی غزہ میں اسرائیلی فضائی حملے میں شہید ہو گئے ہیں۔ حماس نے تصدیق کی ہے کہ جنگ بندی معاہدے کے بعد شمالی غزہ میں ہونے والے تازہ اسرائیلی حملوں میں تنظیم کے ترجمان عبداللطیف القانوع شہید ہو گئے ہیں، جو حالیہ دنوں میں شہید ہونے والے حماس کے اعلی عہدے داروں میں شامل ہیں۔الاقصی ٹی وی کے مطابق، اسرائیلی فوج نے فضائی حملے کے دوران جبالیہ میں پناہ گزین کیمپ کو نشانہ بنایا، جس وقت عبداللطیف القانوع کیمپ میں موجود تھے۔طبی ذرائع کے مطابق، اسی حملے میں متعدد افراد زخمی ہوئے، جب کہ غزہ سٹی میں مختلف حملوں میں تقریبا 6 افراد اور جنوبی غزہ کے علاقے خان یونس میں ایک شخص شہید ہو گیا۔یاد رہے کہ رواں ہفتے کے آغاز میں اسرائیلی حملے میں حماس کے رکن اسماعیل برہوم اور سینئر رہنما صلاح البرداویل بھی شہید ہو گئے تھے۔