پشاور ہائیکورٹ میں افغان کمشنر اور نان کیڈر ملازمین کی تعیناتی چیلنج

پشاور(اباسین خبر) افغان کمشنر اور دیگر نان کیڈر ملازمین کی تعیناتی کے اقدام کو پشاور ہائیکورٹ میں چیلنج کر دیا گیا۔ درخواست افغان رفیوجی آرگنائزیشن (اے آر او) کے 18 افسران اور ملازمین نے دائر کی جس میں وفاقی حکومت، افغان رفیوجی آرگنائزیشن، کمشنر افغان رفیوجی اور ایڈیشنل اکانٹ جنرل کو فریق بنایا گیا ہے۔درخواست میں موقف اپنایا گیا کہ اے آر او کے ملازمین کے لیے 2018 کے رولز کے تحت گریڈ 19 اور 18 کے افسران کی ترقی تنظیم کے ہی ملازمین میں سے کی جائے گی جبکہ گریڈ 20 کی اسامی کو پی ایم ایس، پی سی ایس اور پی اے ایس کے افسران سے پر کیا جائے گا۔ درخواست کے مطابق وفاقی حکومت اور دیگر فریقین نے مختلف محکموں سے ڈیپوٹیشن پر ملازمین اے آر او میں تعینات کر دیے ہیں، جن میں کمشنر افغان مہاجرین بھی شامل ہیں، جن کا افغان مہاجرین کے معاملات سے متعلق کوئی تجربہ نہیں۔درخواست گزاروں کا کہنا ہے کہ نان کیڈر ملازمین کی تعیناتی غیر آئینی اور غیر قانونی ہے، کیونکہ اس طرح کی تعیناتیاں اعلی عدالتوں کے فیصلوں کے خلاف ہیں۔ درخواست میں استدعا کی گئی ہے کہ عدالت نان کیڈر ملازمین کی تعیناتی کو غیر قانونی قرار دے اور فریقین کو 2018 کے رولز کا پابند بنائے، ساتھ ہی ان ملازمین کی تعیناتی سے روکا جائے۔