پاکستان میں صنعتی کنٹرول سسٹم میں سنگین سکیورٹی خامیاں، نیشنل سرٹ نے ایڈوائزری جاری کر دی

اسلام آباد(مانیٹرنگ ڈیسک)نیشنل کمپیوٹر ایمرجنسی رسپانس ٹیم (نیشنل سرٹ) نے صنعتی کنٹرول سسٹمز میں سنگین سکیورٹی خامیوں کی نشاندہی کرتے ہوئے ایڈوائزری جاری کر دی ہے۔ ایڈوائزری کے مطابق مائی سکاڈا اور مائی پرو صنعتی کنٹرول سسٹم میں دو انتہائی خطرناک خامیاں پائی گئی ہیں جنہیں سی وی ایس ایس سکیل پر 9.3 کی درجہ بندی حاصل ہے۔ ان خامیوں کے باعث غیر مجاز افراد کو سسٹم پر مکمل کنٹرول حاصل ہو سکتا ہے، جس سے صنعتی عمل میں رکاوٹ، حساس ڈیٹا کی چوری اور حفاظتی خطرات پیدا ہو سکتے ہیں۔ایڈوائزری میں بتایا گیا کہ پرانے اور غیر پیچ شدہ سسٹمز خاص طور پر ان خامیوں کا شکار ہیں۔ نیشنل سرٹ نے صنعتی سسٹمز کو عوامی نیٹ ورک سے الگ رکھنے اور نیٹ ورک ایکسپوژر محدود کرنے کی ہدایت کی ہے۔ اس کے علاوہ، ملٹی فیکٹر آتھنٹیکیشن یقینی بنانے اور ایپلی کیشن وائٹ لسٹنگ اپنانے کی تجویز بھی دی گئی ہے تاکہ غیر مجاز رسائی کو روکا جا سکے۔ اداروں کو ریگولر بیک اپ اور خطرات کی نگرانی کرنے کی بھی ہدایت کی گئی ہے۔