کوئٹہ: ٹرین آپریشن کل سے بحال، وفاقی وزیر حنیف عباسی کا اعلان

کو ئٹہ ( اباسین خبر)وفاقی وزیر ریلوے حنیف عباسی نے کوئٹہ میں پریس کانفرنس کرتے ہوئے ٹرین آپریشن کی بحالی کا اعلان کیا۔ انہوں نے کہا کہ جعفر ایکسپریس کل پشاور سے کوئٹہ روانہ ہوگی اور پرسوں سے کوئٹہ سے سفر شروع کرے گی، جبکہ بولان میل ہفتے کے ساتوں دن چلنے گی۔ عید کے لیے سپیشل ٹرین 29 مارچ کو کوئٹہ سے روانہ ہوگی، جس پر عید کے پہلے تین دنوں کے لیے 20 فیصد رعایت بھی رکھی گئی ہے۔حنیف عباسی نے جعفر ایکسپریس پر حملے کی مذمت کرتے ہوئے کہا کہ یہ حملہ دنیا کے بڑے واقعات میں سے ایک تھا اور قیمتی جانوں کے ضیاع پر افسوس ہے۔ دہشت گردوں نے نہتے شہریوں کو نشانہ بنایا اور اس حملے کی دنیا بھر نے مذمت کی۔ انہوں نے مزید کہا کہ ملک میں جاری دہشت گردی پاکستان کے خلاف منصوبہ بندی کا حصہ ہے اور اس میں دہشت گردوں کو معاونت فراہم کی جارہی ہے۔وزیر ریلوے نے سکیورٹی فورسز کی تعریف کرتے ہوئے کہا کہ ٹرین پر حملے کے بعد سکیورٹی فورسز کا ردعمل قابل اطمینان تھا، اور ضرار کمپنی کے کمانڈوز نے اپنی جانیں خطرے میں ڈال کر لوگوں کی جانیں بچائیں۔ انہوں نے کہا کہ دہشت گردوں کا پیچھا کیا جائے گا اور جو بھی دہشت گرد ہوں گے انہیں گرفتار یا قتل کیا جائے گا۔قبل ازیں حنیف عباسی نے چیئرمین مظہر علی شاہ اور سی ای او ریلوے امیر بلوچ کے ہمراہ کوئٹہ ریلوے سٹیشن کا دورہ کیا اور حملے سے متاثرہ جعفر ایکسپریس کی بوگیوں کا معائنہ کیا۔