قائد اور اقبال کا پاکستان آج نواز شریف کی قیادت میں ترقی کی منازل طے کر رہا ہے: عظمی بخاری

لاہور( اباسین خبر)وزیر اطلاعات پنجاب عظمی بخاری نے یوم پاکستان کے موقع پر اپنے بیان میں کہا کہ “مسلم لیگ نے پاکستان بنایا اور وہی اسے سنوار رہی ہے۔”عظمی بخاری کا کہنا تھا کہ یوم پاکستان ایک نئی سوچ، نئے حوصلے اور جذبے کا نمائندہ دن ہے۔ 23 مارچ ہمیں دنیا میں منفرد اور عظیم قوم بننے کی یاد دلاتا ہے۔ 23 مارچ 1940 کو جس الگ وطن کے لیے عہد کیا گیا، وہ آج اقوام عالم میں ایک روشن ستارے کی طرح چمک رہا ہے۔انہوں نے کہا کہ “مسلم لیگ نے پاکستان بنایا، مسلم لیگ ہی اس کو سنوار رہی ہے۔ قائد اور اقبال کا پاکستان آج نواز شریف کی قیادت میں ترقی کی منازل طے کر رہا ہے۔ الحمدللہ، آج پاکستان اسلامی دنیا کی واحد ایٹمی قوت ہے۔”عظمی بخاری نے کہا کہ “پاکستان نے آگے بڑھنے کے لیے اپنا سفر شروع کیا تھا اور وہ اس سفر کو جاری رکھے گا، تمام اندرونی اور بیرونی سازشوں کا مقابلہ کرتے ہوئے یہ عظیم قوم خوشحالی کی راہ پر گامزن ہوگی۔” انہوں نے ملکی سلامتی اور دفاع کے حوالے سے افواج پاکستان کی خدمات کو سراہا اور کہا کہ “پاکستان کی حفاظت کے لیے اپنی جانوں کا نذرانہ پیش کرنے والے شہدا قوم کے ماتھے کا جھومر ہیں، قوم اپنے عظیم شہدا کی قربانیوں پر فخر کرتی ہے۔