گزشتہ میچ کے مقابلے میں یہ اچھا کھیلا مگر ہمیں پاور پلے میں بہتری لانے کی ضرورت ہے: سلمان آغا

لاہور( سپورٹس ڈیسک)پاکستان کے ٹی ٹوئنٹی فارمیٹ کے کپتان سلمان آغا نے نیوزی لینڈ کے ہاتھوں دوسری بار شکست کے بعد کہا ہے کہ پاکستان کو پاور پلے میں بہتر کارکردگی کی ضرورت ہے۔ انہوں نے کہا کہ گزشتہ میچ کے مقابلے میں یہ اچھا کھیل تھا اور ایک بیٹنگ یونٹ کے طور پر ہمیں پاور پلے میں بہتری لانے کی ضرورت ہے۔ سلمان آغا نے مزید کہا کہ پاکستان نے اس پچ پر اچھی بولنگ کی اور فیلڈنگ بھی شاندار تھی، خاص طور پر حارث رئوف نے بہترین بولنگ کا مظاہرہ کیا۔دوسری جانب نیوزی لینڈ کے کپتان مائیکل بریسویل نے جیت کے بعد کہا کہ ان کے بولرز نے بہترین کارکردگی دکھائی، خصوصا ڈیتھ اوورز میں۔ انہوں نے کہا کہ تیز ہوا میں بولنگ کرنا مشکل تھا لیکن ان کے بولرز نے اس چیلنج کا کامیابی سے سامنا کیا۔یاد رہے کہ دوسرے ٹی ٹوئنٹی میچ میں نیوزی لینڈ نے پاکستان کو 5 وکٹوں سے شکست دی۔ میچ ڈونیڈن میں کھیلا گیا تھا جہاں بارش کے باعث ٹاس اور میچ میں تاخیر ہوئی۔ نیوزی لینڈ نے پاکستان کے 136 رنز کا ہدف با آسانی حاصل کر لیا۔ سیریز میں نیوزی لینڈ کو 2-0 کی برتری حاصل ہے۔پاکستان اور نیوزی لینڈ کے درمیان 5 میچز پر مشتمل ٹی ٹوئنٹی سیریز کا تیسرا میچ جمعے کو آکلینڈ میں کھیلا جائے گا۔