پنجاب پولیس کی خاتون افسر ایس پی عائشہ بٹ کو عالمی ایوارڈ کے لیے منتخب

لاہور( اباسین خبر) پنجاب پولیس کی خاتون افسر ایس پی عائشہ بٹ نے عالمی سطح پر پاکستان کا نام روشن کر دیا ہے۔ انٹرنیشنل ایسوسی ایشن آف ویمن پولیس نے ایس پی عائشہ بٹ کو 2025 کے ایکسی لینس پرفارمنس ایوارڈ کے لیے منتخب کیا ہے۔پنجاب پولیس کے ترجمان نے بتایا کہ ایس پی عائشہ بٹ کو یہ عالمی ایوارڈ گلاسگو، سکاٹ لینڈ میں اس سال ستمبر میں منعقد ہونے والی 62 ویں سالانہ کانفرنس میں دیا جائے گا۔ اس وقت ایس پی عائشہ بٹ سٹی ٹریفک آفیسر گوجرانوالہ کے طور پر خدمات انجام دے رہی ہیں۔یہ ایوارڈ ہر سال دنیا بھر سے ایک خاتون پولیس افسر کو اپنے معاشرتی خدمات کے اعتراف میں دیا جاتا ہے۔ ایس پی عائشہ بٹ کو پولیسنگ کے شعبے میں شاندار کارکردگی اور خدمات کی بنا پر یہ اعزاز دیا گیا ہے۔آئی جی پنجاب ڈاکٹر عثمان انور نے ایس پی عائشہ بٹ کو محکمہ پولیس کا نام روشن کرنے پر مبارکباد دیتے ہوئے کہا کہ ان کی کامیابی تمام پولیس افسران، خاص طور پر خواتین افسران کے لیے فخر کا باعث ہے۔