نیتن یاہو کی دھمکی: لبنان پر حملے کا امکان

تل ابیب ( مانیٹرنگ ڈیسک)اسرائیلی وزیرِ اعظم نیتن یاہو نے دھمکی دیتے ہوئے کہا ہے کہ کسی بھی ممکنہ خطرے کی صورت میں اسرائیل جنوبی لبنان اور دیگر لبنانی علاقوں پر حملے کرے گا۔ عرب میڈیا کے مطابق، نیتن یاہو نے جنوبی لبنان اور بیروت کے مضافی علاقوں پر جاری اسرائیلی فضائی حملوں کے حوالے سے کہا کہ جو لوگ لبنان کی صورتحال کو نہیں سمجھتے تھے، انہیں اب ہمارے عمل سے ہماری سوچ کا اندازہ ہو گیا ہے۔انہوں نے مزید کہا کہ اسرائیل لبنان پر جنگ بندی زبردستی مسلط کرنے جا رہا ہے۔ دوسری جانب، اسرائیل نے گزشتہ روز جنگ بندی معاہدے کے بعد لبنان پر پہلی بمباری کی۔لبنانی صدر جوزف عون نے اسرائیلی فضائی حملوں کو اسرائیل اور لبنان کے درمیان جنگ بندی معاہدے کی خلاف ورزی قرار دیا ہے۔ فرانس کے دورے پر موجود لبنانی صدر نے فرانسیسی صدر میکرون سے ملاقات کے دوران اسرائیلی حملوں کے بارے میں آگاہ کیا، جس پر میکرون نے فوری ردعمل دیتے ہوئے کہا کہ یہ حملے ناقابلِ قبول خلاف ورزی ہیں۔