جنگ بندی کی خلاف ورزی،اسرائیل کی غزہ پر وحشیانہ بمباری، 50 فلسطینی شہید

غزہ ( مانیٹرنگ ڈیسک)غزہ میں اسرائیلی فوج کی جانب سے کی جانے والی وحشیانہ بمباری میں خواتین اور بچوں سمیت 50 فلسطینی شہید ہوگئے۔ غیر ملکی میڈیا کے مطابق، گزشتہ 24 گھنٹوں میں جنوبی غزہ اور دیگر علاقوں پر اسرائیلی فوج نے بمباری کی، جبکہ اسرائیلی ٹینکوں نے رفح اور خان یونس میں پناہ گزین کیمپوں کو گولہ باری کا نشانہ بنایا۔ اس بمباری میں شہید ہونے والوں میں ایک ماں اور بیٹا بھی شامل ہیں، اور متعدد زخمی فلسطینیوں کی حالت نازک بتائی جارہی ہے۔اسرائیلی جنگی طیاروں نے غزہ کے شمالی علاقے میں ایک رہائشی عمارت کو بھی نشانہ بنایا۔ اسرائیلی فورسز کے حملے مسلسل 12 دنوں سے جاری ہیں اور یہ حملے مختصر وقت کی جنگ بندی کے بعد شروع کیے گئے ہیں۔دوسری جانب، برطانیہ اور فرانس نے غزہ میں انسانی صورتحال اور امدادی کارکنوں کے تحفظ کے حوالے سے اقوام متحدہ کی سیکورٹی کونسل کا اجلاس بلانے کا مطالبہ کیا ہے۔