ٹیسلا اگلے ماہ سعودی عرب میں اپنی مصنوعات کی فروخت شروع کرے گی

کیلیفورنیا( مانیٹرنگ ڈیسک) معروف امریکی کمپنی ٹیسلا نے اعلان کیا ہے کہ وہ اگلے ماہ سعودی عرب میں اپنی مصنوعات کی فروخت شروع کرے گی۔ کمپنی نے اپنی ویب سائٹ پر جاری کردہ بیان میں بتایا کہ ٹیسلا 11 اپریل سے سعودی عرب کے تین بڑے شہروں ریاض، جدہ اور دمام میں پاپ اپ سٹورز کھولے گی۔بیان میں کہا گیا ہے کہ ریاض میں ٹیسلا کا لانچ ایونٹ 10 اپریل کو منعقد ہوگا، جہاں کمپنی اپنی ای وی (الیکٹرک گاڑیاں) اور شمسی توانائی سے چلنے والی مصنوعات کی نمائش کرے گی۔لانچ ایونٹ کے دعوت نامے میں مہمانوں سے درخواست کی گئی ہے کہ وہ اس بات کا ذکر کریں کہ وہ کس ٹیسلا کار کے ماڈل میں دلچسپی رکھتے ہیں۔ کمپنی نے مزید کہا کہ سعودی عرب میں اپنی مصنوعات کے حوالے سے آئندہ ہفتوں میں مزید تفصیلات کا اعلان کیا جائے گا۔یہ قدم سعودی عرب میں ٹیسلا کی تجارت کی بحالی کا غماز ہے، کیونکہ اس سے قبل ایلون مسک اور سعودی عرب کے درمیان خراب تعلقات کی وجہ سے ٹیسلا سعودی عرب میں اپنی مصنوعات کی فروخت نہیں کر رہی تھی۔