عوام کو سستی بجلی کی فراہمی خبر بہت جلد وزیراعظم سنائیں گے: وزیرخزانہ

اسلام آباد( کامرس ڈیسک)وزیر خزانہ و سینیٹر محمد اورنگزیب نے کہا ہے کہ وزیر اعظم کی قیادت میں بجلی کے نرخوں میں کمی کے لیے اقدامات کیے جا رہے ہیں اور اس حوالے سے جلد ہی وزیر اعظم کی طرف سے اعلان متوقع ہے۔چین کے با فورم کے دوران عالمی جریدے بلوم برگ کو انٹرویو دیتے ہوئے وزیر خزانہ نے کہا کہ بجلی کی قیمتوں میں کمی سے مینوفیکچرنگ سیکٹر کو فروغ ملے گا اور برآمدات میں اضافہ ہوگا۔ انہوں نے مزید کہا کہ حکومت کی توجہ معیشت کو بہتر بنانے پر مرکوز ہے اور ملکی برآمدات کو بڑھانے کی حکمت عملی پر عمل پیرا ہے۔آنے والے وفاقی بجٹ میں ٹیکس دائرہ وسیع کرنے پر زور دیا جائے گا، جس میں ریئل اسٹیٹ، ریٹیل اور زراعت کے شعبوں کو ٹیکس نظام میں شامل کیا جائے گا تاکہ مینوفیکچرنگ سیکٹر پر غیر ضروری ٹیکسوں کا بوجھ کم کیا جا سکے۔وزیر خزانہ نے مہنگائی کے رجحانات پر اطمینان کا اظہار کرتے ہوئے کہا کہ مجموعی اور بنیادی مہنگائی کی سطح پر گہری نظر رکھی جا رہی ہے۔ انہوں نے یہ بھی کہا کہ اس سال کے دوران شرح سود میں مزید کمی متوقع ہے، جس سے اقتصادی ترقی کے لیے حالات بہتر ہوں گے۔محمد اورنگزیب نے اس سال پاکستان کے پہلے چینی یوان بانڈ کے اجرا کا بھی اعلان کیا، جس کی مالیت 200 سے 250 ملین ڈالر کے درمیان ہو گی۔ یہ بانڈ موسمیاتی تبدیلیوں سے متعلق منصوبوں کے لیے استعمال کیا جائے گا اور اس کا مقصد مالیاتی ذرائع میں تنوع پیدا کرنا ہے۔