سمندر کے راستے یورپ بھجوانے کے جھانسے میں ملوث 4 انسانی اسمگلرز گرفتار

لاہور( اباسین خبر)ایف آئی اے گجرانوالہ زون نے سمندر کے راستے شہریوں کو یورپ بھجوانے میں ملوث 4 انسانی اسمگلرز کو گرفتار کر لیا ہے۔ ملزمان کی شناخت محمد ادریس، عمر فاروق، مرزا نعیم بیگ اور اللہ دتہ کے نام سے ہوئی ہے، جنہیں گجرانوالہ اور گجرات کے مختلف علاقوں سے گرفتار کیا گیا۔ترجمان کے مطابق ملزمان شہریوں کو بیرون ملک بھجوانے کے جھانسے دے کر کروڑوں روپے ہتھیاتے رہے۔ ملزم نعیم بیگ نے ایک شہری سے 73 لاکھ روپے لے کر اٹلی بھجوانے کا وعدہ کیا تھا، مگر اسے لیبیا بھیج دیا، جہاں سے غیر قانونی طور پر یورپ بھجوانے کی کوشش کی گئی۔ شہری نے کشتی کے ذریعے سفر کرنے سے انکار کر کے واپس آ کر پولیس کو اطلاع دی۔ادریس اور عمر فاروق نے یورپ اور دیگر ممالک میں ملازمت کا جھانسہ دے کر 1 کروڑ 31 لاکھ روپے سے زائد رقم لوٹی۔ اللہ دتہ نے بھی شہریوں سے لاکھوں روپے بٹورے۔ملزمان نے بیرون ملک بھجوانے کے وعدے پر بھاری رقوم وصول کیں، تاہم ان کی کوششیں ناکام ہو گئیں۔ ان کے خلاف تفتیش جاری ہے اور دیگر ساتھیوں کی گرفتاری کے لیے چھاپے مارے جا رہے ہیں۔