نیپرا سے رجوع،حکومت نے بجلی صارفین کوریلیف دینے کیلئے کمرکس لی

اسلام آباد( کامرس ڈیسک)وفاقی حکومت نے بجلی صارفین کو مزید ریلیف دینے کے لیے ٹیرف ڈیفرینشل سبسڈی بڑھانے کے لیے نیپرا سے رجوع کر لیا۔ نیپرا میں سبسڈی سے متعلق سماعت 4 اپریل کو ہو گی، جس میں اپریل سے جون تک 3 ماہ کے لیے سبسڈی میں اضافہ کرنے کی تجویز ہے۔اس سبسڈی سے ڈسکوز اور کے الیکٹرک کے صارفین کو 1 روپے 71 پیسے فی یونٹ ریلیف ملے گا، اور لائف لائن صارفین کے علاوہ تمام صارفین کو سبسڈی دی جائے گی۔ گزشتہ روز آئی ایم ایف نے بجلی ٹیرف میں ایک روپے فی یونٹ کمی کی اجازت دی تھی، جو کیپٹیو پاور پلانٹس پر عائد لیوی سے حاصل ہونے والے ریونیو سے دی جائے گی۔حکومت بجلی صارفین کے لیے ریلیف پیکیج پر بھی کام کر رہی ہے، جس کا اعلان آئی ایم ایف کی منظوری کے بعد کیا جائے گا۔ پاکستان اور آئی ایم ایف کے درمیان اسٹاف لیول ایگریمنٹ کے تحت نئی کاربن لیوی متعارف کرانے پر اتفاق ہوا ہے، جبکہ بجلی کے نرخوں میں کمی کے ساتھ پانی کی قیمتوں میں اضافے اور آٹوموبائل سیکٹر کو عالمی تجارت کے لیے کھولنے پر بھی اتفاق کیا گیا ہے۔