5
نیوزی لینڈ( سپورٹس ڈیسک) نیوزی لینڈ کرکٹ ٹیم کے کپتان ٹام لیتھم ہاتھ کی انجری کے باعث پاکستان کے خلاف ون ڈے سیریز سے باہر ہوگئے ہیں۔ نیوزی لینڈ کرکٹ نے ایک بیان میں کہا کہ نیٹ پریکٹس کے دوران ٹام لیتھم کے دائیں ہاتھ میں گیند لگنے سے فریکچر ہوگیا ہے۔نیوزی لینڈ کرکٹ بورڈ کے مطابق ہنری نکلز کو ٹام لیتھم کی جگہ اسکواڈ میں شامل کر لیا گیا ہے، جبکہ مائیکل بریسویل، جو ٹی ٹوئنٹی سیریز میں کپتان تھے، ون ڈے سیریز میں بھی کپتانی جاری رکھیں گے۔نیوزی لینڈ کرکٹ بورڈ نے یہ بھی کہا کہ ول ینگ صرف پہلے ون ڈے میچ کے لیے دستیاب ہوں گے کیونکہ وہ بچے کی ولادت کی وجہ سے باقی میچز نہیں کھیلیں گے۔ ان کی جگہ رہیز ماریو اسکواڈ میں شامل کیے گئے ہیں۔واضح رہے کہ پاکستان اور نیوزی لینڈ کے درمیان پہلا ون ڈے میچ 29 مارچ کو نیپئیر میں کھیلا جائے گا۔
