جوفرا آرچر نے آئی پی ایل کی تاریخ کا مہنگا ترین سپیل کر کے ناپسندیدہ ریکارڈ اپنے نام کر لیا

حیدر آباد( سپورٹس ڈیسک)انگلش فاسٹ بالر جوفرا آرچر نے انڈین پریمیئر لیگ (آئی پی ایل) کی تاریخ کا مہنگا ترین سپیل کروا کر ناپسندیدہ ریکارڈ اپنے نام کر لیا۔ آئی پی ایل کے 18 ویں سیزن میں راجستھان رائلز اور سن رائزز حیدرآباد کی ٹیمیں مدمقابل تھیں، جہاں سن رائزز حیدرآباد کے بیٹرز نے راجستھان کے بالرز کا بھرکس نکال دیا اور 20 اوورز میں 6 وکٹوں پر 286 رنز بنا کر آئی پی ایل کی تاریخ کا دوسرا بڑا سکور کیا۔اس میچ میں راجستھان رائلز کے بالر جوفرا آرچر نے 4 اوورز میں بغیر کوئی وکٹ حاصل کیے 76 رنز دیے، جو کہ آئی پی ایل کی تاریخ میں کسی بھی بالر کا سب سے مہنگا سپیل ہے۔ اس سے قبل یہ ناپسندیدہ ریکارڈ گزشتہ سال گجرات ٹائٹنز کے بالر موہت شرما کے پاس تھا، جنہوں نے دہلی کیپیٹلز کے خلاف 4 اوورز میں 73 رنز دیے تھے۔سن رائزز حیدرآباد کے 287 رنز کے ہدف کے تعاقب میں راجستھان کی ٹیم نے 6 وکٹوں پر 242 رنز سکور کیے، لیکن وہ ہدف حاصل نہ کر سکی۔