پاکستان کو درپیش چیلنجز سے نمٹنے کے لیے ریاست ہر ممکن اقدامات کر رہی ہے:وزیر اعلی بلوچستان

کوئٹہ( اباسین خبر)وزیر اعلی بلوچستان سرفراز بگٹی نے یوم پاکستان کے موقع پر قوم کو مبارکباد دیتے ہوئے کہا کہ 23 مارچ کا دن ہمیں اتحاد، قربانی اور حب الوطنی کا درس دیتا ہے۔ انہوں نے اس دن کی اہمیت پر زور دیتے ہوئے کہا کہ یوم پاکستان ہمیں عزم، یکجہتی اور قربانیوں کی یاد دلاتا ہے، اور ہمیں ملک و قوم کی سلامتی اور ترقی کے لیے ہر قربانی دینے کا عہد کرنا ہوگا۔سرفراز بگٹی نے کہا کہ پاکستان کو درپیش چیلنجز سے نمٹنے کے لیے ریاست ہر ممکن اقدامات کر رہی ہے، اور دشمن عناصر کے ناپاک عزائم کو خاک میں ملا دیا جائے گا۔ انہوں نے یہ بھی کہا کہ دہشت گردوں اور ان کے سہولت کاروں کے لیے بلوچستان میں کوئی جگہ نہیں ہے، اور بلوچستان کے عوام نے ہمیشہ دہشت گردی کے خلاف ریاست کا ساتھ دیا ہے۔وزیراعلی نے مزید کہا کہ سکیورٹی فورسز اور عوام کی قربانیاں رائیگاں نہیں جائیں گی اور دشمن کو بھرپور جواب دیا جائے گا۔