سندھ میں افغان باشندوں کی ملک بدری کا دوسرا مرحلہ: 9 دن میں غیرقانونی مقیم افغانوں کو ملک چھوڑنے کی مہلت

سندھ( اباسین خبر)سندھ میں دوسرے مرحلے میں قانونی اور غیر قانونی افغان باشندوں کی ملک بدری کے لیے تیاریاں مکمل کی جا رہی ہیں۔ غیرقانونی تارکین اور افغان کارڈ ہولڈرز کے پاکستان چھوڑنے کی مہلت میں صرف 9 دن باقی رہ گئے ہیں، افغان باشندوں کو 15 فروری سے 31 مارچ تک رضاکارانہ واپسی کی پیشکش کی گئی تھی۔ذرائع کے مطابق حکومت سندھ نے سیکیورٹی، آپریشنل اور اسٹریٹجک پلان تیار کر لیا ہے اور 1 اپریل سے غیر قانونی مقیم افغان باشندوں کو بے دخل کیا جائے گا۔ وفاق کی ہدایت پر افغان باشندوں کی ملک بدری کا پلان محکمہ داخلہ اور کمشنرز کی مشاورت سے تیار کیا گیا ہے، اور سندھ بھر میں ڈویژن اور ضلعی سطح پر کمیٹیاں فعال کر دی گئی ہیں۔ ہولڈنگ پوائنٹس بھی قائم کیے گئے ہیں جہاں افغان باشندوں کو منتقل کیا جائے گا۔ذرائع کا کہنا ہے کہ جن افغان قیدیوں کی سزائیں پوری ہو چکی ہیں، انہیں بھی ہولڈنگ پوائنٹس منتقل کیا جائے گا۔ ڈپٹی کمشنر کیماڑی اور ڈپٹی کمشنر جیکب آباد کی سربراہی میں ہولڈنگ پوائنٹس قائم کیے گئے ہیں، جہاں محکمہ بلدیات کا عملہ اور محکمہ صحت کا پیرا میڈیکل اسٹاف تعینات ہے۔