بھارتی اداکارہ سرگن مہتا کو بڑا دھچکا،  70 لاکھ کے فراڈ کا سامنا

ممبئی ( شوبز ڈیسک)معروف اداکارہ اور پروڈیوسر سرگن مہتا نے انکشاف کیا ہے کہ جب وہ اور روی دوبے اپنا پہلا ٹی وی شو “اڈاریاں” بنا رہے تھے، تو انہیں 70 لاکھ روپے کے فراڈ کا سامنا کرنا پڑا۔انہوں نے حالیہ انٹرویو میں اپنی پروڈکشن کمپنی کی مشکلات پر روشنی ڈالی۔ سرگن مہتا نے بتایا کہ اڈاریاں کے دوران انہوں نے اپنی ساری جمع پونجی لگا دی تھی، اور جب شو کا سیٹ بن رہا تھا، تو کسی نے ان کے ساتھ 70 لاکھ کا فراڈ کر دیا۔وہ بتاتی ہیں کہ اس وقت شو کے آن ایئر جانے میں صرف 15 دن رہ گئے تھے اور ان کے پاس صرف ایک خالی فلور تھا۔ اس صورتحال میں سرگن غصے میں آرٹ ڈائریکٹر سے جھگڑ پڑیں اور سیکیورٹی کو مداخلت کرنا پڑی۔ یہ وقت انہیں شدید ذہنی دبا میں مبتلا کر گیا اور وہ کار میں بیٹھ کر رونے لگیں کہ آیا پروڈیوسر بننے کا فیصلہ درست تھا یا نہیں۔اس دوران روی دوبے نے حوصلہ نہیں کھویا اور سرگن کو تسلی دیتے ہوئے کہا، “گئی نا؟ نظر اتر گئی! سب ٹھیک ہو جائے گا، ہم دوبارہ کما لیں گے۔”یہ مشکل وقت 4 سے 5 ماہ تک جاری رہا، لیکن سرگن اور روی کی محنت اور صبر نے انہیں کامیاب بنایا۔ آج “اڈاریاں” انڈسٹری کا ایک کامیاب شو ہے، جس میں پرینکا چہر چودھری، انکت گپتا، ابھیشیک کمار اور ایشا ملویہ جیسے مشہور ستارے شامل تھے۔