سردیاں تو چلی گئیں، خشک میوہ جات کا استعمال اب بھی ضروری

لاہور( ہیلتھ ڈیسک)خشک میوہ جات کا استعمال عموما موسمِ سرما میں بڑھ جاتا ہے، مگر ماہرین کا کہنا ہے کہ اسے پورے سال اپنی خوراک کا حصہ بنانا چاہیے۔ مناسب مقدار میں خشک میوہ جات کا استعمال ہر موسم میں صحت کے لیے فائدہ مند ثابت ہوتا ہے اور یہ ایک ایسی نعمت ہے جو صحت مند جسم اور زندگی کے لیے بہت ضروری ہے۔ہالینڈ کی ایک تحقیق کے مطابق، اگر روزانہ آدھی مٹھی خشک میوہ جات کا استعمال کیا جائے تو یہ مختلف بیماریوں کی وجہ سے جلد اموات کے خطرے کو کم کر سکتا ہے۔ماہرین کے مطابق، روزانہ کی خوراک میں کچھ خاص خشک میوہ جات کو شامل کرنا چاہیے جن میں بادام، اخروٹ، پستہ، کاجو، اور کشمش شامل ہیں۔ ان میوہ جات میں وٹامنز، معدنیات، فائبر، اور صحت بخش چکنائیاں موجود ہوتی ہیں جو دل کی صحت، دماغی فعالیت، اور مجموعی صحت کو بہتر بناتی ہیں۔لہذا، خشک میوہ جات کا استعمال نہ صرف سردیوں میں بلکہ تمام سال بھر کیا جانا چاہیے تاکہ جسم کو ضروری غذائی اجزا ملیں اور بیماریوں سے بچا جا سکے۔