صوبے کی ترقی اور عوامی فلاح و بہبود کے لیے ہر ممکن اقدامات کیے جاررہے ہیں، وزیر اعلیٰ بلوچستان

کوئٹہ ( اباسین خبر)وزیر اعلی بلوچستان میر سرفراز بگٹی سے پیر کے روز چیف منسٹر سیکرٹریٹ میں مختلف شخصیات نے ملاقات کی جن میں اراکین اسمبلی، اعلی صوبائی حکام، اور دیگر اہم شخصیات شامل تھیں۔ ملاقات میں مشیر بلدیات نوابزداہ بابا امیر حمزہ خان زہری، ڈی جی ایوی ایشن ونگ کیپٹن علی آزاد کی قیادت میں انٹرنی پائلٹس، سابق نگران صوبائی وزیر یحیی خان ناصر، میر دانش خان لانگو، حیات اللہ غلزئی اور رکن قومی اسمبلی ملک شاہ گورگیج بھی موجود تھے۔ملاقاتوں کے دوران مختلف امور پر تبادلہ خیال کیا گیا، جن میں صوبے کی ترقی، ہوابازی کے شعبے میں بہتری، عوامی فلاح و بہبود اور دیگر باہمی دلچسپی کے معاملات شامل تھے۔ وزیر اعلی بلوچستان میر سرفراز بگٹی نے انٹرنی پائلٹس سے گفتگو کرتے ہوئے کہا کہ بلوچستان کے نوجوانوں کو ہوابازی اور دیگر تکنیکی شعبوں میں آگے بڑھنے کے لیے تمام ممکنہ مواقع فراہم کیے جا رہے ہیں۔انہوں نے مزید کہا کہ بلوچستان میں ایوی ایشن کے فروغ سے ترقی کے نئے دروازے کھلیں گے اور مقامی سطح پر مہارت یافتہ افراد کو زیادہ مواقع میسر آئیں گے۔ اس موقع پر سابق نگران صوبائی وزیر یحیی خان ناصر اور حیات اللہ غلزئی نے بھی وزیر اعلی سے ملاقات کی اور صوبے کی سیاسی و سماجی صورتحال، عوامی مسائل اور ترقیاتی اقدامات پر تبادلہ خیال کیا۔وزیر اعلی نے اس موقع پر کہا کہ حکومت بلوچستان عوام کی فلاح و بہبود کے لیے تمام ممکنہ اقدامات کر رہی ہے اور صوبے کے ترقیاتی منصوبوں پر تیزی سے عمل درآمد جاری ہے۔ رکن قومی اسمبلی ملک شاہ گورگیج نے بھی وزیر اعلی بلوچستان سے ملاقات کی اور صوبے کی مجموعی ترقی، عوامی مسائل اور دیگر اہم امور پر تبادلہ خیال کیا۔