ایپل کی آئی فون 16 سیریز کا سستا ترین فون متعارف

کراچی ( مانیٹرنگ ڈیسک)ایپل نے 19 فروری کو آئی فون 16 ای کو متعارف کرایا ہے، جو اس کی سب سے سستی ڈیوائس ہے۔ اس نئے ماڈل میں ہوم بٹن کا استعمال ختم کر دیا گیا ہے، جس کے بعد ایپل کی تمام ڈیوائسز ہوم بٹن فری ہو گئی ہیں۔ آئی فون 16 ای کی قیمت 599 ڈالرز سے شروع ہوگی اور یہ آئی فون ایس ای (2022) کی جگہ لے گا، جو ٹچ آئی ڈی بٹن (ہوم بٹن) کے ساتھ آخری آئی فون تھا۔اس نئے آئی فون کا ڈیزائن آئی فون 14 سے ملتا جلتا ہے لیکن فیچرز میں یہ آئی فون 16 کے قریب ہے۔ اس میں ایپل کی اے 18 چپ موجود ہے اور 6.1 انچ کا او ایل ای ڈی ڈسپلے دیا گیا ہے، جو اسکرین کے لحاظ سے بھی آئی فون 16 کے مشابہ ہے۔ تاہم، فون کے بیک پر 48 میگا پکسل کا کیمرا ہے، جو کہ آئی فون 16 سے کچھ پیچھے ہے لیکن 2x زوم کی سہولت فراہم کرتا ہے۔ایپل نے دعوی کیا ہے کہ آئی فون 16 ای بیٹری کی پرفارمنس میں سب سے بہترین ہے اور یہ سنگل چارج پر آئی فون 11 سے 6 گھنٹے زیادہ چلتا ہے۔ یہ بیٹری 2016 کے آئی فون ایس ای کے مقابلے میں 12 گھنٹے زیادہ چلتی ہے۔فون کو ان لاک کرنے کے لیے فیس آئی ڈی کی سہولت دی گئی ہے، جبکہ چارجنگ کے لیے یو ایس بی سی سپورٹ بھی فراہم کی گئی ہے۔ آئی او ایس 18 سے لیس اس فون میں ایپل انٹیلی جنس ماڈل کی سپورٹ موجود ہے، جس کے ذریعے صارفین کو اے آئی فیچرز ملیں گے۔ اس میں سائیڈ پر ایکشن بٹن بھی دیا گیا ہے جو کیمرا کنٹرول کے لیے استعمال نہیں کیا جا سکتا۔یہ ایپل کا پہلا آئی فون ہے جس میں کمپنی کا تیار کردہ موڈیم استعمال کیا گیا ہے، جو سیٹلائیٹ کنکٹویٹی کی سہولت بھی فراہم کرتا ہے۔ اس کے ذریعے ایمرجنسی ایس او ایس، روڈ سائیڈ اسسٹنٹس، میسجز اور سیٹلائیٹ کے ذریعے فائنڈ مائی فون جیسے فیچرز استعمال کیے جا سکتے ہیں۔نیا آئی فون سفید اور سیاہ رنگوں میں 28 فروری سے مختلف ممالک میں دستیاب ہوگا، اور یہ ایپل کا سب سے سستا فون بنے گا کیونکہ آئی فون ایس 3 کو کمپنی نے ختم کر دیا ہے۔