خیبرپختونخوا ، 10 لاکھ غریب خاندانوں کیلئے رمضان پیکیج کے فنڈز منظور

پشاور( اباسین خبر) خیبرپختونخوا کابینہ کے اجلاس میں 10 لاکھ غریب خاندانوں کے لیے رمضان اور عید پیکیج کے لیے فنڈز کی منظوری دے دی گئی۔ اجلاس وزیراعلی خیبرپختونخوا علی امین خان گنڈا پور کی زیر صدارت منعقد ہوا، جس میں انہوں نے ہدایت کی کہ غربا، یتیموں اور ٹرانسجینڈر افراد کو پیکیج شفاف طریقے سے فراہم کیا جائے، اور دہشتگردی سے متاثرہ غریب خاندانوں کو بھی شامل رکھا جائے۔علی امین گنڈا پور نے یہ بھی کہا کہ غریب، معذور افراد کا خصوصی خیال رکھا جائے اور صوبے کے تمام ٹرانسجینڈر افراد کو پیکیج دیا جائے۔ پیکیج کی تقسیم 15 رمضان سے پہلے مکمل کرنے کی ہدایت کی گئی، جبکہ تنخواہوں اور پنشن کی ادائیگی 25 فروری کو کرنے کا فیصلہ کیا گیا۔کابینہ اجلاس میں ایبٹ آباد پبلک سکول میں زیر تعلیم 15 یتیم طلبہ کے لیے 4.92 ملین روپے کی سالانہ گرانٹ کی منظوری بھی دی گئی۔ ارباب نیاز کرکٹ سٹیڈیم کو بانی پی ٹی آئی کے نام سے منسوب کرنے کی بھی منظوری دی گئی۔اجلاس میں سپریم کورٹ کے فیصلے کی روشنی میں کیڈٹ کالج سوات فیز-III پروجیکٹ کے لیے زمین کی لاگت میں اضافے کے تحت فنڈز کی منظوری اور ایلیمنٹری اینڈ سیکنڈری ایجوکیشن فانڈیشن کے 3687 اساتذہ کی تنخواہوں کے لیے 1028.673 ملین روپے جاری کرنے کی بھی منظوری دی گئی۔کابینہ اجلاس میں موٹر وہیکل رولز 1969 میں ترامیم کی منظوری دی گئی تاکہ بس اڈوں کی بہتر انسپکشن کو ممکن بنایا جا سکے، محکمہ اوقاف کے لیے گرانٹ کی منظوری دی گئی، اور بی ایس نرسنگ گریجویٹس کے لیے 31000 روپے ماہانہ انٹرن شپ منصوبے کی منظوری بھی دی گئی۔ اس کے علاوہ، سائنس، ٹیکنالوجی و آئی ٹی کے لیے خیبرپختونخوا گورنمنٹ رولز آف بزنس 1985 میں ترامیم منظور کی گئیں۔