احمد علی اکبر کی قوالی نائٹ کے بعد مہندی نائٹ کی دھوم

لاہور( شو بز ڈیسک)معروف پاکستانی اداکار احمد علی اکبر کی مہندی کی تقریب کی تصاویر اور ویڈیوز منظرِ عام پر آ گئیں۔پاکستان شوبز انڈسٹری میں اس وقت شادیوں کا سیزن جاری ہے اور یکے بعد دیگرے فنکاروں کی شادی کی خبریں سامنے آ رہی ہیں۔ مداح ابھی کبری خان اور گوہر رشید، امیر گیلانی اور ماورا حسین کی شادی کی تصاویر کے سحر سے باہر نہیں نکلے تھے کہ اب احمد علی اکبر کی مہندی کی تصاویر اور ویڈیوز سوشل میڈیا پر وائرل ہو گئی ہیں۔احمد علی اکبر نے اپنی شادی کے حوالے سے کوئی خبر مداحوں کے ساتھ شیئر نہیں کی، تاہم ان کے قریبی دوست اور اداکار عثمان مختار نے انسٹاگرام پر مہندی نائٹ کی تصاویر شیئر کیں۔مختلف سوشل میڈیا پیجز پر مہندی کی تقریب سے دولہا اور دلہن کا ویڈیو کلپ بھی شیئر کیا گیا، جس میں یہ جوڑی خوب ہلہ گلہ کرتی نظر آ رہی ہے۔شیئر کی گئی تصاویر میں اداکار عثمان خالد بٹ، گلوکار و اداکار عزیر جیسوال، اداکارہ اشنا شاہ سمیت دیگر شوبز شخصیات بھی نظر آ رہی ہیں۔واضح رہے کہ احمد علی اکبر جلد ڈیجیٹل کری ایٹر ماہم بتول کے ہمراہ رشتہ ازدواج میں منسلک ہو جائیں گے۔ ان کی شادی کے سلسلے میں مختلف نجی تقریبات منعقد کی جا رہی ہیں۔