بالائی علاقوں میں بارش، برفباری، راستے بند، پاک فوج کا ریسکیو آپریشن شروع

لاہور( اباسین خبر)ملک میں جاڑے کی شدت برقرار ہے، جس کے نتیجے میں بارش اور برفباری کے بعد شمالی بالائی بلوچستان کی رابطہ سڑکیں آمدورفت کے لیے بند ہوگئیں۔ آزاد کشمیر، گلگت بلتستان اور خیبرپختونخوا کے پہاڑی علاقوں میں برفباری وقفے وقفے سے جاری رہی، جس کی وجہ سے کئی بالائی علاقوں کی رابطہ سڑکیں بھی بند ہوگئیں۔ برفباری کے باعث گریس ویلی کا زمینی رابطہ منقطع ہوگیا۔پاک فوج اور سول انتظامیہ کی مشینری اور عملہ کیل سے تا بٹ تک سڑک کھولنے میں مصروف رہا، اور 25 کلومیٹر سڑک کو ہلمت تک کھول دیا گیا۔ مریضوں اور مقامی افراد کو نکالنے کے لیے پاک فوج نے ہیلی کاپٹر سروس فراہم کی۔ اس کے علاوہ، 2 ماہر امراض نسواں سمیت 7 ڈاکٹروں کی ٹیم ہلمت منتقل کردی گئی، تاکہ وہاں کے لوگوں کو ضروری طبی امداد فراہم کی جا سکے۔ سیریس مریضوں کو طبی ضرورت کے مطابق کیل اور مظفرآباد منتقل کیا گیا۔ سرداری میں ایک مفت طبی کیمپ بھی منعقد کیا گیا۔