پنجاب حکومت کا لاکھوں خاندانوں کو ’نگہبان رمضان پیکیج‘ دینے کا فیصلہ

لاہور( اباسین خبر) پنجاب حکومت نے لاکھوں خاندانوں کو “نگہبان رمضان پیکیج” دینے کا اصولی فیصلہ کیا ہے۔ وزیر اعلی پنجاب مریم نواز کی زیر صدارت خصوصی اجلاس میں اس پیکیج کے حوالے سے مختلف تجاویز اور سفارشات پر غور کیا گیا۔وزیراعلی مریم نواز نے شہریوں کو ہدایت کی کہ وہ 15 فروری تک اس پیکیج کے لیے رجسٹریشن مکمل کرائیں، اور شفافیت کو یقینی بنانے کے لیے ضروری اقدامات کرنے کا حکم بھی دیا۔ انہوں نے کہا کہ نگہبان رمضان پیکیج نادار افراد کا حق اور حکومت کا فرض ہے، اور عوام کو عزت و احترام کے ساتھ ان کا حق فراہم کیا جانا چاہیے۔مریم نواز نے اس بات پر زور دیا کہ رمضان کے مہینے میں عوام کی خدمت عبادت سمجھ کر کی جائے، اور لائنوں میں لگنا قطعی طور پر پسند نہیں کیا جائے گا۔اجلاس کے دوران بتایا گیا کہ “نگہبان رمضان پیکیج” کے لیے پی ایس ای آر میں رجسٹریشن ضروری ہے، جسے گھر بیٹھے آن لائن پورٹل pser.punjab.gov.pk کے ذریعے یا یونین کونسل اور بلدیہ دفاتر میں بھی کرایا جا سکتا ہے۔ اس پیکیج کے لیے ہیلپ لائن 080002345 بھی قائم کر دی گئی ہے۔