علشبہ خان بڑیچ نے ‘ینگ وومن آف دی ایئر’ ایوارڈ جیت لیا، پاکستان کا نام روشن

لندن ( شوبز ڈیسک)پاکستانی ناول نگار علشبہ خان بڑیچ نے ‘ویمن چینجنگ دی ورلڈ ایوارڈز 2025’ کے تحت ‘ینگ وومن آف دی ایئر’ ایوارڈ جیتا ہے۔ یہ بین الاقوامی ایوارڈ خواتین کی دنیا بھر میں مثبت خدمات کو سراہنے کے لیے دیا جاتا ہے۔علشبہ خان بڑیچ کو یہ اعزاز 3 اپریل کو لندن میں منعقدہ ایک تقریب میں دیا گیا، جہاں انہیں زمبابوین امریکی ڈاکٹر ٹرینٹ اور برطانیہ کی شہزادی سارہ فرگوسن نے ایوارڈ سے نوازا۔میڈیا رپورٹس کے مطابق علشبہ کا کام بلوچستان کے حوالے سے غالب بیانیوں کو از سر نو ترتیب دینے پر مرکوز رہا ہے۔ وہ پاکستان کی سب سے کم عمر ناول نگار ہیں، جنہوں نے 11 سال کی عمر میں اپنا پہلا ناول لکھا، 14 سال کی عمر میں یادداشت لکھی اور 16 سال کی عمر میں اپنی کتاب خود شائع کی۔علشبہ خان بڑیچ اقوام متحدہ کے ادارے یونیسیف کے ساتھ یوتھ ایمبیسیڈر برائے ذہنی صحت اور انسداد پولیو کے لیے بھی کام کر چکی ہیں۔ وہ اس وقت وزیراعظم شہباز شریف کی یوتھ ایڈوائزر، نیشنل یوتھ کونسل کی رکن اور کوئٹہ گلیڈی ایٹرز کی یوتھ ایمبیسیڈر ہیں۔علشبہ کا کہنا تھا کہ جب پاکستان کا نام ایوارڈ کے لیے پکارا گیا تو یہ صرف ان کا ذاتی سنگ میل نہیں تھا بلکہ اس بات کا ثبوت تھا کہ نوشکی اور کوئٹہ سے صرف عسکریت پسندی کی خبریں نہیں، بلکہ حوصلہ مند اور باصلاحیت کہانیاں بھی ابھر سکتی ہیں۔