دوسری شادی کے لیے بیٹی نے بےحد حوصلہ افزائی کی، دانیہ انور

لاہور( شو بز ڈیسک)پاکستان شوبز کی اداکارہ دانیہ انور نے حال ہی میں اپنی پہلی شادی، طلاق اور دوسری شادی کے بارے میں کھل کر بات کی۔ انہوں نے بتایا کہ ان کا کبھی دوسری شادی کا ارادہ نہیں تھا، تاہم جب انہیں ایک اچھا شخص ملا تو انہوں نے شادی کا فیصلہ کیا۔دانیہ انور نے کہا کہ ان کی پہلی شادی 19 سال کی عمر میں ہوئی تھی اور یہ شادی 6 سال تک برقرار رہی۔ تاہم، ان کے پہلے شوہر نشے کے عادی تھے اور ان کے رویے میں وقت کے ساتھ ساتھ مزید خرابی آتی گئی۔ وہ نہ صرف جسمانی تشدد کرتے بلکہ ان کی تضحیک بھی کرتے تھے، جس کی وجہ سے دانیہ نے اس رشتہ کو ختم کرنے کا فیصلہ کیا۔طلاق کے بعد، دانیہ نے کچھ وقت کے لیے دوبارہ شادی کرنے کا نہیں سوچا، مگر جلد ہی ان کی زندگی میں ایک اچھا شخص آیا، جس سے ان کا تعلق دو سال تک رہا۔ اداکارہ نے انکشاف کیا کہ ان کی بیٹی نے دوسری شادی کے لیے ان کی حوصلہ افزائی کی تھی۔ دانیہ کا کہنا تھا کہ انہوں نے دوسری شادی نہ صرف اپنی خوشی بلکہ بچوں کی بھلائی کے لیے بھی کی۔دانیہ انور نے مزید کہا کہ اب وہ 37 سال کی ہیں اور اپنی زندگی میں سکون اور خوشی محسوس کر رہی ہیں۔ ان کی ساس اور سسر بھی بہت اچھے ہیں اور وہ ان کی رہنمائی کرتے ہیں۔ کچھ دن پہلے ایک پروگرام میں دانیہ نے یہ بھی انکشاف کیا کہ وہ مشہور فلمی اداکار ندیم بیگ کی بہو اور فرحان بیگ کی اہلیہ ہیں۔