اینٹی نارکوٹکس فورس کا بڑا آپریشن، 20 کروڑ روپے مالیت کی منشیات برآمد

اسلام آباد( اباسین خبر)اینٹی نارکوٹکس فورس (اے این ایف) نے ملک بھر میں جاری مہم کے تحت مختلف شہروں میں 8 کامیاب آپریشنز کیے ہیں جس میں 2530.11 کلو گرام منشیات برآمد کی گئی ہے، جن کی مالیت 20 کروڑ 49 لاکھ روپے سے زائد ہے۔تفصیلات کے مطابق، اینٹی نارکوٹکس فورس نے ذاکر کیمپ چاغی کے غیر آباد علاقے میں کارروائی کرتے ہوئے 2311 کلو چرس اور 66 کلو افیون برآمد کی۔ مستونگ کے پہاڑی علاقے سے 105 کلو چرس جبکہ حیدر آباد میں ہوٹل کے قریب 18 کلو چرس برآمد کی گئی۔فیض پور انٹرچینج جڑانوالہ لاہور کے قریب ایک ملزم کے سفری بیگ سے 12 کلو چرس برآمد ہوئی۔ کراچی انٹرنیشنل کنٹینر ٹرمینل سے عمان جانے والی الیکٹرک موٹر سے 8.970 کلو گرام آئس برآمد کی گئی۔چوہڑ چوک بس اسٹاپ راولپنڈی کے قریب گاڑی سے 6 کلو چرس اور ایم ون موٹر وے اسلام آباد کے قریب خاتون سمیت ملزم کے قبضے سے 600 گرام افیون اور 540 گرام آئس برآمد کی گئی۔پشاور میں کوریئر آفس سے لاہور بھیجے جانے والے 4 پارسلز سے 150 گرام افیون اور 1.850 کلو چرس برآمد ہوئی۔تمام کارروائیوں میں گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔