اورنگی ٹائون میں اصلی پولیس مقابلے کے دوران ملزم امیر بخش زخمی حالت میں گرفتار

کراچی ( اباسین خبر)اورنگی ٹائون میں پولیس کے ساتھ مبینہ مقابلے کے دوران ملزم امیر بخش زخمی حالت میں گرفتار کر لیا گیا۔ پولیس حکام کے مطابق، ملزم کے قبضے سے چوری شدہ موٹر سائیکل اور 30 بور پستول برآمد ہوئے ہیں۔ایس ایس پی بشیر احمد بروہی کے مطابق، ملزم امیر بخش ڈکیتی، اسلحہ برداری، پولیس مقابلے اور کراچی سے موٹر سائیکلیں چھیننے اور چوری کرنے کی متعدد وارداتوں میں ملوث ہے۔ پولیس نے مزید تحقیقات میں معلوم کیا کہ ملزم کے قبضے سے تھانہ ملیر کینٹ کی حدود سے چوری ہونے والی ایک موٹر سائیکل بھی برآمد کی گئی۔پولیس ذرائع کے مطابق، ملزم کراچی سے موٹر سائیکلیں چوری کر کے بلوچستان میں فروخت کرتا تھا اور اس کے دیگر جرائم پیشہ گروپوں سے بھی روابط ہیں۔ ملزم کے خلاف مختلف تھانوں میں مقدمات درج ہیں اور پولیس نے اس کے ساتھیوں کی گرفتاری کے لیے خصوصی ٹیمیں تشکیل دے دی ہیں۔ایس ایس پی بشیر احمد بروہی نے کہا کہ پولیس اور اے وی ایل سی کی ٹیموں نے ملزم کی گرفتاری میں اہم کردار ادا کیا ہے۔ پولیس مزید تفتیش کر رہی ہے تاکہ ملزم کے دیگر جرائم اور ساتھیوں کا سراغ لگایا جا سکے۔