یوٹیوب شارٹس میں بڑی تبدیلی، ویوز کانٹ اب ٹک ٹاک اور انسٹاگرام کی طرح دکھایا جائے گا

کیلیفورنیا( مانیٹرنگ ڈیسک)یوٹیوب نے اپنی شارٹس ویڈیوز کے ویوز کانٹ میں بڑی تبدیلی کرنے کا اعلان کیا ہے جس سے صارفین کو اپنی ویڈیوز کی پرفارمنس کا بہتر اندازہ ہوگا۔ اب یوٹیوب شارٹس میں ویوز کے بجائے ویڈیوز کو کتنی بار پلے یا ری پلے کیا گیا ہے، یہ نمبر دکھائے جائیں گے۔اس سے پہلے، شارٹس ویڈیوز کے ویوز کی جگہ یہ دکھایا جاتا تھا کہ ویڈیو کو کتنے وقت تک دیکھا گیا۔ کمپنی کا کہنا ہے کہ یہ تبدیلی صارفین کے مطالبے پر کی جا رہی ہے، جو چاہتے تھے کہ وہ جان سکیں کہ ان کی ویڈیوز کتنی بار دیکھی جا رہی ہیں۔یوٹیوب کا ماننا ہے کہ اس تبدیلی سے صارفین کو اپنی ویڈیوز کی رسائی کو بہتر سمجھنے کا موقع ملے گا، اور وہ اس کے مطابق مواد تیار کر سکیں گے۔ اس کے ساتھ ساتھ، انہیں برانڈز کے ساتھ شراکت داری کرنے کے مزید مواقع بھی ملیں گے۔یہ نیا سسٹم ٹک ٹاک اور انسٹاگرام ریلز کے ویو کانٹ سسٹم کی طرح ہوگا، جس میں ویڈیوز کے پلے اور ری پلے کے نمبرز دکھائے جاتے ہیں۔ اس تبدیلی کے بعد، صارفین اب بھی ویڈیوز کے دیکھے جانے کے دورانیے کو ایڈوانسڈ موڈ میں جا کر “انگیجڈ ویوز” کے طور پر دیکھ سکیں گے۔کمپنی کا کہنا ہے کہ اس تبدیلی سے ویڈیوز پر حاصل ہونے والی آمدنی یا یوٹیوب پارٹنر پروگرام میں شمولیت کی اہلیت پر کوئی اثر نہیں پڑے گا۔ یہ نئی تبدیلی 31 مارچ سے نافذ ہو جائے گی۔