لاہور ہائی کورٹ کا لاہور ڈویژن میں گولیوں سے کتے مارنے کی مہم روکنے کا حکم

لاہور( اباسین خبر)لاہور ہائی کورٹ نے لاہور ڈویژن میں گولیوں سے کتوں کو مارنے کی مہم روکنے کا حکم دیتے ہوئے پنجاب حکومت، ڈی سی لاہور اور ایم سی ایل سے جواب طلب کر لیا۔لاہور ہائی کورٹ کے جسٹس شاہد کریم نے ایرج حسن اور دیگر کی درخواست پر سماعت کی، جس میں پنجاب حکومت، کمشنر لاہور ڈویژن، ڈپٹی کمشنر لاہور سمیت دیگر کو فریق بنایا گیا تھا۔دوران سماعت، درخواست گزار کے وکیل نے موقف اختیار کیا کہ انتظامیہ لاہور ڈویژن میں کتوں کو غیرقانونی طریقے سے تلف کر رہی ہے، حالانکہ آوارہ کتوں کو ویکسین کے ذریعے تلف کرنے کی پالیسی مرتب کی گئی تھی۔ وکیل نے یہ بھی بتایا کہ گزشتہ دو ہفتوں میں ایک ہزار سے زائد کتوں کو گولی مار کر تلف کیا گیا۔عدالت نے کتا مار مہم کے خلاف حکم امتناع جاری کرتے ہوئے سرکاری وکیل کو ہدایات لیکر آئندہ سماعت پر پیش ہونے کا حکم دیا اور لاہور ڈویژن میں تاحکم ثانی کتا مار مہم روک دی۔