چینی کی قیمتیں اور وفاقی وزرا کی تنخواہیں ایک ہی رفتار سے بڑھ رہی ہیں:بیرسٹر محمد علی سیف

پشاور( اباسین خبر)مشیرِ اطلاعات خیبر پختونخوا بیرسٹر محمد علی سیف نے کہا ہے کہ چینی کی قیمت اور وفاقی وزرا کی تنخواہیں دونوں شہباز اسپیڈ سے بڑھ رہی ہیں۔اپنے بیان میں بیرسٹر محمد علی سیف نے کہا کہ حکومت نے سرکولیشن سمری کے ذریعے وزرا کی تنخواہوں میں 188 فیصد اضافے کی منظوری دی ہے۔ انہوں نے مزید کہا کہ چینی کی قیمتوں میں اضافے کی وجہ یہ ہے کہ حکمران اور چینی کے کارخانوں کے مالکان ایک ہی ہیں۔بیرسٹر سیف نے شوگر مافیا کو تنقید کا نشانہ بناتے ہوئے کہا کہ اس نے ناجائز منافع کما کر اپنی عید میٹھی اور عوام کی عید پھیکی کر دی ہے۔ انہوں نے عرفان صدیقی سے اپیل کی کہ وہ شہباز شریف سے درخواست کریں کہ اپنی تنخواہ لیں اور چینی کی قیمتیں کم کرائیں۔