کینیا کے دور دراز گاؤں میں ’اسپیس آبجیکٹ‘ کا ٹکڑا آگیا

کینیا ( مانیٹرنگ ڈیسک)کینیا کے مکوکو گاں میں ایک بڑا، سرخ گرم خلائی ملبے کا ٹکڑا گرا جس کے بعد کینیا کی خلائی ایجنسی (کے ایس اے) نے فوری طور پر تحقیقات کا آغاز کیا۔ کے ایس اے کے مطابق، یہ چیز خلائی ملبے کا حصہ ہو سکتی ہے، اور اس کی لمبائی تقریبا 2.5 میٹر اور وزن 500 کلوگرام کے قریب بتایا جا رہا ہے۔پولیس حکام نے اس بات کی تصدیق کی کہ یہ ٹکڑا گرنے کے بعد ابھی تک گرم تھا جب مقامی پولیس نے اس کا معائنہ کیا، اور حفاظتی تدابیر کے تحت علاقے کے رہائشیوں کو دور رکھا۔ ابتدائی تحقیقات سے یہ بات سامنے آئی ہے کہ یہ چیز کسی راکٹ کا ٹوٹا ہوا حصہ ہو سکتی ہے۔خلائی ملبے کے اس طرح زمین پر گرنا نادر واقعہ سمجھا جاتا ہے، کیونکہ عام طور پر یہ ملبہ یا تو جل کر فضا میں تباہ ہو جاتا ہے یا سمندر میں گر جاتا ہے۔ اس واقعے نے خلائی ملبے کے حوالے سے بڑھتے ہوئے خدشات کو اجاگر کیا ہے، خاص طور پر جب سیٹلائٹ کی سرگرمیاں بڑھ رہی ہیں اور اس طرح کے ٹکڑے زمین پر گر رہے ہیں۔کے ایس اے اس ملبے کا تجزیہ کر رہی ہے اور اس کی اصل شناخت کے لیے تحقیقات جاری رکھے ہوئے ہے۔