ملک کے مختلف شہروں میں سردی کی شدت برقرار، پارہ منفی 11 تک گر گیا

لاہور( اباسین خبر)ملک کے مختلف شہروں میں سردی کی شدت برقرار ہے، شدید سردی اور برفباری سے درجہ حرارت منفی 11 تک گر گیا۔وفاقی دارالحکومت اسلام آباد میں درجہ حرارت منفی ایک ڈگری ریکارڈ کیا گیا، جبکہ لہہ میں کم سے کم درجہ حرارت منفی 11 ریکارڈ کیا گیا۔سکردو میں درجہ حرارت منفی 9، زیارت میں منفی 8، کوئٹہ اور گلگت بلتستان میں منفی 7، ستور اور دالبندین میں منفی 6 تک گر گیا۔دوسری جانب، مختلف شہروں میں دھند کا راج بھی برقرار ہے جس کے باعث موٹر ویز متعدد مقامات سے بند کر دی گئی ہیں۔ موٹروے ایم ون برہان انٹرچینج سے پشاور تک بند ہے، جبکہ ایم 2 ٹھوکر نیاز بیگ سے خانقاہ ڈوگراں تک بھی ٹریفک کے لیے بند ہے۔ترجمان موٹر وے پولیس کے مطابق، ایم 3 پر فیض پور سے رجانہ تک اور ایم 11 محمود بوٹی سے سمبڑیال تک دھند کے باعث بند کر دی گئی ہیں، اور شہریوں کو غیر ضروری سفر سے گریز کرنے کی ہدایت کی گئی ہے۔